Ці вы адчулі пах вясновы?...

Ці вы адчулі пах вясновы?
А ці пазналі родны край?
У сталакцітах крышталёвых –
Зноў сакавіцкі сонцаграй!

Цішком пракраўшыся праз межы
У нашы вёскі, гарады,
Вясна наладжвае капежы,
Дажджом растайвае ільды.

Нырае ў лункі з сантыметрам,
Каб рыбакоў ад іх прагнаць,
Шпурляе ў птушак подых ветру –
“А ну – гняздзечкі будаваць!”

Звініць адталаю вадзіцай…
Цалуе душы цяплынёй…
І промні сонца – нібы спіцы –
Нястомна круціць над зямлёй…

Змятае сон з вачэй заспаных
Ласкавым дотыкам рукі…
І, блаславіўшы закаханых,
Сплятае шчасце ў вянкі…