Ірына Багдановіч

RSS Feed

Час бэзу

Сярэдняя: 5 (1 голас)
Бэз безупынны, бязлітасны, бэз летуценны, 
Бэз як бязмежжа памкненняў, пачуццяў іграння. 
Бэз каралеўскі, сармацкі, бухмата-праменны, 
Бэз як прэлюдыя лета, фарцісіма траўня.

Як мы з табою адкрылі такую краіну? 
У кнізе якой прачыталі, з якой бібліятэкі? 
Спынімся ж тут, каб таемную зведаць хвіліну 
Бэзавай, боскай, пяшчотнай чароўнай апекі.

Бэз каляровы, ліловыя вогнішчы бэзу, 
Срэбныя футры, драбнюткія флянсікі кветак. 
Хтосьці самотны, напэўна, прыдумаў імпрэзу: 
Гэта фарцісіма траўня, прэлюдыя лета.

Бэз як бяспечнасць, як сімвал радзінных фальваркаў, 
Кожнай шляхецкай сядзібы належнае ўбранне, 
Бэз як вяршэнства Айчыны, а ўсіх недавяркаў 
Зможа вясна гэтым бэзавым траўневым граннем.
 
Бэз як бясконцасць высока абранага шляху. 
Бэз як ахова на гэтым шляху ад нячыстых. 
Бэз як шаленства... Я трачу прытомнасць ад паху 
I ад кахання.
                     Бэз!
                           Гэта Боскі трыумф урачысты.

Усе аўтары